Déning: Tyas Nur Wigati (20020114032)
Edhitor: Rizka Alfionita (20020114037)
Sumber gambar : seringjalan.com
Indonesia dikenal karo semboyan Bhinneka Tunggal Ika sing nduweni teges beda-beda nanging tetep dadi siji. Beda ragam suku,budaya, agama, lan ras nanging tetep dadi siji. Salah siji wujud kebhinekaan Indonesia, yaiku akehe jenis jogedan sing kasebar saka Sabang nganti Merauke, salah sijine yaiku joged Reog Ponorogo. Reog Ponorogo mujudake salah siji seni tarian ing Jawa Timur sing isih tetep dilestarekake nganti saiki. Reog iki minangka kebudayan lan kesenian asli Indonesia. Pancen budaya lan seni iki asring digandhengake karo hal-hal sing mambu mistis , amarga asring disambungake karo kekuwatan spiritual. Singo barong minangka salah sawijining karakter paling ikonik ing kesenian iki, yaiku topeng gedhe awujud sirah singa kanthi hiasan wuluh merak. Kajaba singo barong, tokoh liya kaya jathil, warok, bujang ganong, lan klono sewandono uga nambahi rame ing pagelaran Reog Ponorogo.
Mistise kesenian iki wis dudu rahasiane wong akeh. Nyatane sakdurunge pagelarane, para pembarong lan rombongan reog liyane tansah nindakake ritual dhisik. Prakara iku pancene dadi prakara sing wajar, amarga ora mungkin bisa nganggo topeng kanthi bobot 50 kg sajrone wektu sing suwe banget mung nganggo untu. Makna saka ritual sakdurunge pementasan seni Reog kasebut ugi minangka salah sawijining usaha masyarakat kanggo nyegah alangan-alangan sing bisa kedadeyan nalika pagelaran kanthi menehi sesaji minangka rasa ngajeni marang anane roh sing dipercaya masyarakat minangka penunggu barongan. Sesaji-sesaji sing ditindakake dening masyarakat ora kanggo njaluk utawa nyembah roh-roh kasebut nanging kanggo upah supaya dheweke ora ngganggu manungsa. Amarga sejatine jin lan setan iku diciptakake Gusti kanggo ngganggu manungsa.
Reog minangka salah sawijining asil cipta, rasa lan karsane manungsa mesthi ngemot nilai-nilai budaya kang ana ing njerone. Iki minangka kaya kesenian Reog ing Ponorogo sing nyebutake yen ana sesambungane karo aspek budaya, saka kesenian Reog nduweni nilai-nilai Jawa sing ”adiluhung”. Kesenian iki dadi tontonan lan tuntunan kanggo masyarakat. Kesenian Reog dadi salah siji ciri khas lan sumber nilai sing larang regane, utamane kanggo masyarakat ing Kitha Ponorogo.
Ing jaman globalisasi uga ana owah-owahan ing masyarakat sing mesthi uga ngrubah seni tradisi, kayata seni tradisi Reog Ponorogo sanajan owah-owahan sing kedaden namung sethitik. Owah-owahan kuei ana ing tokoh seni Reog mbiyen lan saiki, ritual ing tari reog tetep ditindakake sadurunge pagelaran lan ora tau goyah dening owah-owahan jaman. Saka jaman mbiyen nganti saiki bab-bab sing ana gegayutane karo prosesi ritual isih tetep ora ditambahi lan dikurangi.Reog Ponorogo asring digelar rikala adicara mantenan, sunatan, dina-dina nasional, lan festival taunan sing digelar dening pamerentah. Festival Reog Nasional uga digelar rikala arep mlebu wulan Maharam utawa wulan Suro. Pagelaran reog Ponorogo kalebu rerangken saka adicara Grebeg Suro utawa saperlu ulang taun kitha Ponorogo
Tidak ada komentar:
Posting Komentar